Вы тут

Што цікавага прапануе наведвальнікам вясенні кірмаш «Адпачынак-2024»?


З 18 па 20 красавіка на канькабежным стадыёне культурна-спартыўнага комплексу «Мінск-арэна» пройдзе 26-ты міжнародны вясенні кірмаш турыстычных паслуг «Адпачынак-2024». У ім возьмуць удзел больш за 300 экспанентаў, у тым ліку прадставяць свой турыстычны патэнцыял усе 118 раёнаў Беларусі, а таксама 10 найбуйнейшых беларускіх гарадоў. Сярод удзельнікаў і 27 рэгіёнаў Расіі, а таксама Турцыя, Куба і іншыя замежныя краіны. Арганізатары абяцаюць, што наведвальнікаў чакае шмат сюрпрызаў і прапаноў, у прыватнасці са зніжкамі можна набыць туры і паслугі. Таксама у рамках мерапрыемства пройдзе міжнародная спецыялізаваная выстаўка-кірмаш «Паляванне і рабалоўства». 


Фота з адкрытых крыніц

Як адзначыў намеснік міністра спорту і турызму Алег Андрэйчык, выстаўка гэта не толькі значнае турыстычнае, але і сацыяльна-культурнае, грамадскае, эканамічнае мерапрыемства. 

— Яно ўнікальнае па некалькіх прычынах. Па-першае, выстаўка да месца перад пачаткам актыўнага турыстычнага сезону. Усе навінкі сезона абавязкова будуць прэзентаваны на форуме. Па-другое гэта міжнароднае мерапрыемства, дзе пацвердзілі ўдзел 12 краін, за апошнія тры гады гэта рэкордная лічба. Па-трэцяе, гэта значнае дзелавое мерапрыемства са сваімі падзеямі ў розных фарматах — воркшопаў, канферэнцый, перамоў, прэзентацый, — расказаў Алег Андрэйчык.

Дарэчы, падчас мерапрыемства будзе працаваць пяць дзелавых пляцовак: дзве сцэнічныя і тры канферэнц-залы. 

Але галоўнай «разынкай» мерапрыемства стане ўдзел усіх 118 раёнаў і 10 найбуйнейшых гарадоў, якія цягам трох дзён у рэжыме нон-стоп прадэманструюць свае культурныя, гістарычныя, турыстычныя і гастранамічныя адметнасці. Дарэчы, упершыню (а выстаўка, нагадаем, праводзіцца 26-ты раз) яна не змагла змясціць усіх ахвотных на ранейшай пляцоўцы і было прынята рашэнне пераехаць на «Мінск-арэну». 

Дадаткова будуць праведзены дні абласцей: 18 красавіка свой турыстычны патэнцыя прэзентуюць Брэсцкая і Віцебская вобласць, 19-га — Магілёўшчына, Гродзеншчына і Гомельшчына, а 20-га — сталіца і Мінская вобласць. Яны будуць суправаджацца культурнай праграмай, розыгрышамі прызоў, да таго ж кожны рэгіён падрыхтаваў для гасцей адмысловыя сюрпрызы.

Свая праграма і ў дзелавой частцы выстаўкі: 18-га красавіка раскажуць пра новыя праекты і лічбавыя прадукты, аб’екты і маршруты, дзень 19 красавіка будзе прысвечаны дзелавому, прамысловаму, адукацыйнаму турызму, турыстычна-інфармацыйным цэнтрам, якія пачалі адкрывацца летась. У рамках выстаўкі пройдзе і 2-га расійска-беларускі турыстычны кангрэс, дзе будуць абмеркаваны пытанні тураператарскай дзейнасці, а таксама ўдзельнікі падзеляцца вопытам супрацоўніцтва паміж рэгіёнамі Расіі і Беларусі. 

Сярод экспанентаў 27 рэгіёнаў Расіі, што ў тры разы больш, чым летась. Сярод іх Ніжагародская вобласць, Башкартастан, Дагестан, Карэлія, Чалябінская, Калінінградская, Смаленская, Уладзімірская вобласці, Санкт-Пецярбург. Дарэчы, Ніжагародская вобласць выступае генеральным партнёрам выстаўкі. 

На сёння расійскі турыстычны рынак для Беларусі з’яўляецца самым значным і перспектыўным, дадаў Алег Андрэйчык. Ён прывёў лічбы, што ў 2019 годзе за межы Беларусі выязджала больш за мільён арганізаваных турыстаў. У 2023 годзе іх колькасць знізілася ў 2,5 раза — да 400 тысяч. Але значна павялічыўся лік турыстаў, якія падарожнічаюць па Беларусі ( з 1 300 тысяч ў 2019-м да 1 700 тысяч у 2023-м). Другі важны трэнд пасля падарожжаў унутры краіны — паездкі ў краіны СНД і найперш Расію. 

— За апошнія два-тры гады мы бачым штогод 50-працэнтнае павелічэнне плыні арганізаваных турыстаў у Расію і з Расіі да нас. Летась каля 250 тысяч беларусаў набылі ў туркампаній туры ў Расію. Па даных Белстату нашу краіну летась наведала больш за пяць мільёнаў расійскіх турыстаў пры тым, што ўсяго было 5 мільёнаў 800 тысяч турыстаў. Таму сёння гэта асноўны напрамак і ён развіваецца. Калі раней расіяне выбіралі Мінск, Віцебск і Брэст, то сёння любыя прапановы ўспрымаюцца пазітыўна. Гэта не толькі абласныя цэнтры, але і Полацк, Пінск і іншыя гарады, Белавежская пушча, Браслаўшчына, Налібоцкая пушча, нацыянальныя паркі. Бачым тэндэнцыю, што расіяне вяртаюцца, наведваючы ўсё новыя рэгіёны, — падкрэсліў Алег Андрэйчык. 

У сваю чаргу беларусы сталі актыўна асвойваць акрамя Масквы і Санкт-Пецярбурга і такія рэгіёны, як Каўказ, Цэнтральную Расію, Смаленскую, Бранскую і Пскоўскую вобласці. Ёсць цікавасць і да такіх краін, як Узбекістан, Казахстан, Азербайджан, Кыргызстан. 

Дарэчы, сярод удзельнікаў форуму «Адпачынак-2024» Узбекістан, Туркменістан, Палесціна, Куба, Турцыя, Кыргызстан. 

— Цікавасць да выстаўкі штогод расце. Усё больш замежных калег і партнёраў наведвае мерапрыемства ў складзе дзелавых дэлегацый, — адзначыў дырэктар Нацыянальнага выставачнага цэнтра «БелЭкспа» кіраўніцтва справамі Прэзідэнта Сяргей Баран.

Цікавым, але недаацэненым беларусамі пакуль застаецца Індыя, улічваючы, што нацыянальны авіяперавозчык «Белавія» ажыццяўляе авіямаршрут з Мінска ў Нью-Дэлі. Разглядаецца адкрыццё новага авіямаршрута з Мінска на кітайскі востраў Хайнань (курортны горад Санья). Актыўна ў кірунку адкрыцця авіяпералётаў мінспорту працуе з Кубай і Венесуэлай.

Алена КРАВЕЦ

Выбар рэдакцыі

Рэгіёны

Што абмяркоўвалі на нарадзе органаў мясцовага самакіравання Брэстчыны ў Пінскім раёне?

Што абмяркоўвалі на нарадзе органаў мясцовага самакіравання Брэстчыны ў Пінскім раёне?

Добраўпарадкаванне населеных пунктаў і навядзенне парадку на зямлі.

Калейдаскоп

Усходні гараскоп на наступны тыдзень

Усходні гараскоп на наступны тыдзень

Стральцам на гэтым тыдні не трэба пераацэньваць сваіх магчымасцяў.