У Падзвінні толькі ў дзвюх фермерскіх гаспадарках займаюцца арганічным земляробствам

Паводле інфармацыі камітэта па сельскай гаспадарцы і харчаванні Віцебскага аблвыканкама, у Падзвінні толькі ў дзвюх фермерскіх гаспадарках займаюцца арганічным земляробствам. Зямлю, якая знаходзіцца ў Докшыцкім і Глыбоцкім раёнах, сертыфікавалі. Плошчы невялікія, адзначылі ў камітэце і дадалі, што, верагодна, вырошчваннем «чыстай ежы» займаецца больш энтузіястаў, але яны пакуль не трапілі ў статыстычныя справаздачы. Таму лічбы па Віцебшчыне пакуль сціплыя.

Пра тое, што прадстаўнікоў арганічнага земляробства ў паўночным рэгіёне краіны больш, сведчыць, у прыватнасці, асабістае знаёмства аўтара гэтых радкоў з жыхарамі вёскі Гара ў Віцебскім раёне, якія заяўляюць, што ў іх табу на хімію для падкормкі глебы.

Прадстаўнікі арганічнага земляробства, з якімі давялося пагутарыць, заўважалі, што адпаведная сертыфікацыя па еўрапейскіх стандартах — вельмі доўгая і дарагая справа.

Пры гэтым у крамах колькасць прадуктаў з пазначэннем «экапрадукт» павялічваецца. Вось толькі што з гэтага сапраўды зроблена з сыравіны, якая вырашчана без выкарыстання пестыцыдаў?

Тым не менш можна канстатаваць, што ў Віцебскай вобласці цікавасць да арганічнага земляробства расце. У школах культывуюць экалагічнае выхаванне ў гуртках, трэці год вядзецца навучанне ў аграрных класах. Агульная колькасць вучняў у апошніх каля 650. У такіх класах распавядаюць і пра арганічнае земляробства.

У гарадскім пасёлку Копысь Аршанскага раёна аберагаць прыроду вучаць у рэгіянальным інфармацыйным цэнтры па пытаннях абыходжання са стойкімі арганічнымі забруджвальнікамі і небяспечнымі хімічнымі рэчывамі «Зялёнае святло». Ён быў адкрыты ў 2018 годзе пры падтрымцы Міністэрства прыродных рэсурсаў і аховы навакольнага асяроддзя Рэспублікі Беларусь. У рамках праекта закладзены доследны ўчастак для вырошчвання раслін у адпаведнасці з прынцыпамі арганічнага земляробства — без прымянення хімікатаў. Таксама абсталявана хімічная лабараторыя, якая дазваляе праводзіць аналізы ў мэтах вызначэння ўтрымання хімічных злучэнняў у кампанентах навакольнага асяроддзя — вадзе, глебе, раслінах.

Размяшчэнне цэнтра абрана невыпадкова: гарадскі пасёлак Копысь знаходзіцца на мяжы Віцебскай і Магілёўскай абласцей, недалёка ад мяжы з Міншчынай. Такім чынам, цэнтр дзейнічае ў інтарэсах жыхароў трох рэгіёнаў.

У Сенненскім раёне сакрэтам вырошчвання экалагічна чыстых агуркоў, памідораў, зеляніны, бульбы і іншага навучаць пажылых, людзей з абмежаванымі магчымасцямі, у тым ліку і непаўналетніх з асаблівасцямі псіхафізічнага развіцця, якія жывуць у інтэрнаце. Навучаюць тут таксама рэкламе, збыту, арганізацыі сваёй справы. Гэта стала магчымым у рамках рэалізацыі сацыяльнага дабрачыннага праекта «Навучанне жанчын Віцебскай вобласці асновам арганічнага земляробства і аграбізнесу», які ажыццяўляецца пад эгідай Беларускага дзіцячага фонду і камітэта па працы, занятасці і сацыяльнай абароне Віцебскага аблвыканкама.

У Аршанскім раёне ў 2018—2019 гадах быў паспяхова рэалізаваны пілотны сацыяльны праект для ініцыятыўных жанчын «Навучанне жанчын Віцебскай вобласці асновам аграбізнесу, прадукцыйнаму выкарыстанню зямельных участкаў для атрымання дадатковага даходу для сям'і, адкрыцця малога бізнесу і ўключэнню ў працэс самазанятасці». Дзясяткі слухачоў на тэорыі і на практыцы займаліся вырошчваннем арганічнага ўраджаю пад кіраўніцтвам дасведчаных земляробаў.

Дарэчы, многія з тых, хто вырабляе экалагічна чыстую прадукцыю, даюць платныя кансультацыі, майстар-класы, вядуць блогі ў сацыяльных сетках, друкуюцца ў часопісах і такім чынам атрымліваюць дадатковы заробак.

Аляксандр ПУКШАНСКІ

Прэв’ю: pixabay.com