Не па сезоне халоднае надвор’е чакаецца ў Беларусі ў найбліжэйшыя выхадныя паведамляюць спецыялісты Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
Так, цяперашняя вясна не спяшаецца ўступаць у свае правы: то нагадае пра сябе яркім сакавіцкім сонцам, то неба зацягнуць шэрыя аблокі, падзьме халодны вецер і нават закруціць снег. Паводле апошніх звестак, месцамі, а па Віцебскай і Магілёўскай абласцях у многіх раёнах, назіраецца снежнае покрыва вышынёй 1–13 сантыметраў, а па крайнім паўночным усходзе краіны — 16–23 сантыметраў.
А ў пятніцу ўдзень будзе без ападкаў. На асобных участках дарог магчымая галалёдзіца. Максімальная тэмпература паветра ўдзень складзе ад мінус 1 градуса да 5 цяпла. У суботу будзе пераважна без ападкаў, толькі раніцай і ўдзень месцамі па ўсходзе краіны магчымы кароткачасовы снег, мокры снег. На асобных участках дарог магчымая галалёдзіца. Тэмпература паветра ўначы складзе мінус 2–9 градусаў, пры праясненнях — 10–12 марозу. Удзень будзе ад нуля да плюс 7 градусаў.
І ў нядзелю будзе пераважна без ападкаў. Уначы і раніцай на асобных участках дарог магчымая галалёдзіца. Тэмпература паветра ўначы складзе 2–8 марозу, месцамі — да мінус 10 градусаў. Удзень будзе 1–8 цяпла.
Як адзначылі сіноптыкі ў папярэднім прагнозе, у панядзелак і аўторак будзе пераважна без ападкаў. Уначы і раніцай на асобных участках дарог магчымая галалёдзіца. Тэмпература паветра ўначы складзе 1–8 марозу, месцамі — да мінус 10 градусаў. Удзень будзе 2–9 цяпла.
Сяргей КУРКАЧ
Сумесныя праекты ядзерных тэхналогій.
У парадку дня — зацвярджэнне Канцэпцыі нацбяспекі і Ваеннай дактрыны.