Зафіксаваны першы выпадак смерці ад воспы малпаў

Першы выпадак смерці ад воспы малпаў зафіксавалі ўрачы ў Нігерыі, дзе налічваецца 21 хворы. Пра гэта 30 мая паведаміў мясцовы цэнтр прафілактыкі і кантролю захворванняў.

«Па даных на 29 мая пацверджаны 21 выпадак, з якіх адзін лятальны. Памёр саракагадовы пацыент са спадарожнымі захворваннямі, які прымаў імунапаніжальныя прэпараты», — гаворыцца ў паведамленні.

Першы выпадак заражэння чалавека воспай малпаў быў выяўлены яшчэ ў 1970 годзе. Аднак у апошнія месяцы ў розных краінах Еўропы, а таксама ў Амерыцы і Аўстраліі выявілі больш за 250 выпадкаў інфекцыі. У Сусветнай арганізацыі аховы здароўя адзначаюць, што з-за раптоўнага і адначасовага з'яўлення хваробы ў некалькіх краінах, у тым ліку ў неэндэмічных раёнах, вірус мог перадавацца незаўважаным на працягу нейкага часу.

На дадзены момант, як запэўніваюць медыкі, няма неабходнасці ў масавай вакцынацыі людзей ад воспы малпаў. Інфекцыя галоўным чынам перадаецца пры цесным фізічным кантакце, таму асноўнымі спосабамі кантролю захворвання застаюцца адсочванне кантактаў, расследаванне і ізаляцыя.

Воспа малпаў па клінічнай карціне нагадвае натуральную воспу, хаця праходзіць значна лягчэй. Інкубацыйны перыяд захворвання складае 5—21 дзень, у сярэднім — 6—13 дзён. Першыя праявы хваробы — фебрыльная тэмпература — больш за 38,5є; дрыжыкі; інтэнсіўны галаўны боль; моцная слабасць; павелічэнне лімфавузлоў; міялгія — боль у мышцах і спіне.

У сярэднім праз 1—3 дні пасля першых сімптомаў з'яўляецца макулярны сып — плоскія чырвоныя плямы — часцей за ўсё на твары, далонях і ступнях, радзей — на слізістых абалонках рота, палавых органаў і кан'юнктыве — абалонцы вачэй. З часам элементы сыпу відазмяняюцца.

Хвароба доўжыцца 2—4 тыдні. Колькасць сімптомаў залежыць ад узросту, хранічных захворванняў інфікаванага і штама віруса. Заходнеафрыканскі падвід, які распаўсюдзіўся па Еўропе і ЗША, пераносіцца лягчэй, чым штам Конга (цэнтральнаафрыканскі). Вірус асабліва небяспечны для дзяцей, цяжарных жанчын і людзей са зніжаным імунітэтам (напрыклад, якія прымаюць прэпараты для імунасупрэсіі або якія пакутуюць на імунадэфіцыт).

Алена КРАВЕЦ