Вы тут

Што апрануць у новым навучальным годзе беларускія школьнікі


Сёлета для школьнікаў створана каля 800 тысяч розных вырабаў (шыйныя і трыкатажныя, спартыўная форма). 70 % асартыменту ў гэтым годзе абноўлена. У крамах прадстаўлена больш за 400 мадэляў школьнага асартыменту, у прыватнасці звыш 130 мадэляў абутку і больш за сотню скурана-галантарэйных і пісьмовых прылад. Камплект адзення дзелавога стылю каштуе 70—450 рублёў, а аптымальны набор пісьмовых і канцылярскіх прылад — ад 35—40 рублёў, паведамілі спецыялісты.


Чорны, сіні, шэры, клетка

Адзенне дзелавога стылю — так правільна называць школьную форму, мяркуюць спецыялісты, — важны кірунак вытворчасці для прадпрыемстваў лёгкай прамысловасці. Шыць уборы да школьнага сезона пачынаюць яшчэ ў снежні, каб летам яны з'явіліся ў продажы.

— Сёлета непрадказальны ажыятаж са жніўня ў гандлі, чаго раней ніколі не было, але мы гатовыя рэагаваць і дастаўляць тавары, якіх не хапае. Акрамя таго, мы цяпер арыентуем вытворчасць на выраб менавіта тавараў для школьнікаў, — адзначыла Наталля МУРАШКА, намеснік старшыні канцэрна «Беллегпрам». — У найбуйнейшых сталічных крамах у дапамогу прадаўцам працуюць кансультанты, каб дапамагчы бацькам сарыентавацца. А ў кнігі неабходнасці афармляем заявы ад бацькоў, каб забяспечыць дзіця патрэбным памерам пэўнай мадэлі.

Згодна з вынікамі анлайн-апытання, змешчанага на сайце Мінадукацыі, у якім узялі ўдзел больш як 123 тысячы чалавек, аптымальны варыянт адзення для дзяўчынак — штаны, блузка, спадніца. Для хлопчыкаў — кашуля, штаны, джэмпер. У прыярытэце чорны, сіні і шэры колеры, а таксама тканіна ў клетку.

Надбаўкі і скідкі

Пашыраны продаж школьных тавараў пачаўся яшчэ з 15 ліпеня. У Беларусі арганізавана больш за 400 школьных кірмашоў. З дапамогай «Белкаапсаюза» максімальна наладжаны гандаль і ў аддаленых мястэчках краіны. У крамах аформлены куточкі школьніка і куточкі першакласніка, паведаміла Наталля Мельнікава, начальнік упраўлення арганізацыі гандлю і грамадскага харчавання Міністэрства антыманапольнага рэгулявання і гандлю:

— Зроблена тэматычнае афармленне гандлёвых залаў і вітрын, каб інфармаваць пакупнікоў. Змешчаны шыльды і ўказальнікі. На сайтах гандлёвых аб'ектаў змяшчаецца інфармацыя пра наяўнасць тавараў да школы, а школьную форму можна набыць у тым ліку і праз інтэрнэт-крамы.

Надбаўкі на новы школьны асартымент складаюць не больш за 35 %, на тавары мінулага года — ад 0 % да 20 %, а некаторыя тавары былых гадоў можна сустрэць 70-працэнтныя скідкі. Арганізоўваюцца таксама скідкі выхаднога дня, шчодрая пятніца, вечар выхадных пакупак, прапаноўваюцца растэрміноўкі продаж па крэдытных картках. Асобныя прадпрыемствы даюць шматдзетным і сем'ям, дзе выхоўваюцца дзеці-інваліды, 10—15-працэнтныя зніжкі на тавары, дадала спецыяліст.

Абавязковая эмблема школы на адзенні

Ірына Булаўкіна, галоўны спецыяліст Упраўлення агульнай сярэдняй адукацыі Галоўнага ўпраўлення агульнай сярэдняй, дашкольнай і спецыяльнай адукацыі Мінадукацыі нагадала, што адзенне дзелавога стылю паэтапна ўводзілася ва ўстановах адукацыі з 2006-2007 года:

— Галоўную ролю ў вызначэнні знешняга выгляду навучэнца іграе савет адукацыі, у склад якога ўваходзяць бацькі, настаўнікі і вучні. Яны маюць права выбраць колер, мадэль і якасць тканіны, з якой вырабляецца адзенне. З 1 верасня ў Беларусі Мінадукацыяй уводзяцца адзіныя элементы адзення для вучняў з размяшчэннем на ёй эмблемы ўстановы адукацыі.

Увядзенне такіх адзіных элементаў — не новая тэма, падкрэсліла спецыяліст. З 2015 да 2017 года па ініцыятыве канцэрна «Беллегпрам» рэалізоўваўся пілотны праект «Школа будучыні», у межах якога асобныя ўстановы адукацыі выбралі ўвядзенне адзіных элементаў школьнага адзення. Летась каля 16 % школ выкарыстоўвалі іх у адзенні дзелавога стылю.

Сёлета ўстановы адукацыі вызначыліся з адзінымі элементамі школьнага стылю. Гэта камізэлька, пінжак і гальштук.

Ірына СІДАРОК

Фота: БелТА

Выбар рэдакцыі

Грамадства

Дапамогуць бружмель і бацвінне. Якія прадукты варта дадаць у рацыён цяпер, каб умацаваць імунітэт да зімы?

Дапамогуць бружмель і бацвінне. Якія прадукты варта дадаць у рацыён цяпер, каб умацаваць імунітэт да зімы?

Сёння даказана, што лісце морквы, радыскі, рэпы і буракоў карыснае не менш за караняплоды.

Грамадства

Ваша дзіця піша вершы? Абавязкова растлумачце яму пра інтэлектуальную ўласнасць

Ваша дзіця піша вершы? Абавязкова растлумачце яму пра інтэлектуальную ўласнасць

Якія перавагі можа прынесці дзецям інтэлектуальная ўласнасць, расказалі ў НЦІУ.

Грамадства

Вогненныя вёскі. Нельга забыць. Кожны трэці Докшыцкага краю

Вогненныя вёскі. Нельга забыць. Кожны трэці Докшыцкага краю

Сёстры Хатыні... Колькі іх на тэрыторыі Беларусі? Гэту лічбу даследчыкі дакладна не могуць вывесці і сёння.