Вы тут

У Дзяржынскім раёне адкрыўся ўнікальны маркетплэйс «МАГАЗИН еДИН»


Першым наведвальнікам крамы, у якой прадстаўлена прадукцыя прадпрыемстваў Дэпартамента выканання пакаранняў, стаў міністр унутраных спраў Іван Кубракоў. Кіраўнік міліцэйскага ведамства не толькі перарэзаў стужку, што традыцыйна сімвалізуе пачатак дзейнасці пэўнага аб'екта а як уважлівы і скрупулёзны пакупнік, падрабязна азнаёміўся з асартыментам прадукцыі.



Маркетплэйс «МАГАЗИН еДИН» у Дзяржынскім раёне. Фотарэпартаж


Цяпер усё тое, што вырабляецца на прадпрыемствах крымінальна-выканаўчай сістэмы, можна ўбачыць, а каму патрэбна — і набыць, у гандлёвым аб'екце «МАГАЗИН еДИН», які знаходзіцца ў вёсцы Рабінаўка Дзяржынскага раёна. Мэбля для гасцінай, спальнага пакою, калідора і працоўнага кабінета, кухні з масіву (у стылях лофт, кантры, русцік і скандынаўскім стылі), будаўнічыя і гаспадарчыя матэрыялы, медыцынскае і спецыяльнае адзенне, адзенне для палявання і рыбалкі, абутак, тэкстыль — наведвальнік будзе ўражаны разнастайнасцю таго, што тут прадстаўлена.

Шырокі выбар мэблі для саду і адпачынку зацікавіць уладальнікаў прыватных дамоў і дачнікаў: альтанкі, сталы, крэслы, арэлі тут на любы густ і кашалёк. Мангалы і каваныя прыстасаванні для вогнішча, некаторыя з якіх увогуле нагадваюць прадметы мастацтва, ацэняць аматары шашлыкоў і адпачынку на прыродзе. Асаблівую ўвагу заслугоўвае сувенірная прадукцыя: нарды і шахматы, пано і скульптуры жывёл з дрэва могуць стаць арыгінальным падарункам у самых розных выпадках. Уся прадукцыя не толькі якасная, але і даступная па кошце.

— Адкрыццё крамы, нават гандлёвага павільёна, у першую чаргу прадыктавана пажаданнямі грамадзян (фізічных і юрыдычных асоб), а таксама арганізацый і прадпрыемстваў перш за ўсё горада Мінска і Мінскай вобласці, — адзначыў міністр унутраных спраў Іван Кубракоў. — Прадукцыю Дэпартамента выканання пакаранняў мы прадаём даўно. Сёння яна прадстаўлена ў многіх гандлёвых цэнтрах па ўсёй краіне.

Цяпер жа ў грамадзян з'явілася магчымасць паглядзець прадукцыю крымінальна-выканаўчай сістэмы ў адным месцы і выбраць патрэбнае. Азнаёміцца з асартыментам «МАГАЗИН еДИН» можна і на пляцоўцы інтэрнэт-крамы (па адрасе един.бел) — тут прадстаўлена звыш 500 найменняў тавараў. Пакуль дастаўка тавараў будзе ажыццяўляцца па Мінску і Мінскай вобласці. У перспектыве замаўляць прадукцыю Дэпартамента выканання пакаранняў у анлайн-фармаце змогуць жыхары і іншых рэгіёнаў краіны.

Адкрыццё гандлёвай пляцоўкі вырабаў крымінальна-выканаўчай сістэмы — першы вопыт Дэпартамента выканання пакаранняў. Хоць з тым, што ствараецца асуджанымі на спецыяльных прадпрыемствах, кожны з нас так ці інакш сутыкаўся. Гэта і спартыўныя пляцоўкі, і лаўкі ў парках, і спецадзенне... Мала хто ведае, што тыя ж 20-літровыя каністры для дызельнага паліва або бензіну на ўсёй постсавецкай прасторы вырабляе толькі Дэпартамент выканання пакаранняў МУС Беларусі.

Як звярнуў увагу кіраўнік міліцэйскага ведамства, тавары, выпушчаныя крымінальна-выканаўчай сістэмай, не проста якасныя, яны яшчэ маюць і прыемны кошт. «Упэўнены, што гэтая прадукцыя будзе запатрабавана не толькі на тэрыторыі Мінска і Мінскай вобласці, але і ў іншых рэгіёнах, далёка за межамі Рэспублікі Беларусь, — перакананы Іван Кубракоў. — Прадпрыемствы Дэпартамента выканання пакаранняў заваявалі сваю нішу ў гандлі: пачынаючы ад швейнай прадукцыі, дзе выпускаецца і пасцельная бялізна, і адзенне, якое асабліва запатрабавана паляўнічымі і рыбаловамі, заканчваючы будаўніцтвам дамоў. Тут шмат мэблі для дачы, запатрабаваных у сельскай гаспадарцы прылад. Самае галоўнае, што ўсё — па даступнай цане».

«МАГАЗИН еДИН» працуе кожны дзень (без абеду і выхадных) з 9.00 да 20.00. У планах — адкрыццё такога ж гандлёвага аб'екта ў Мінску. Невялікія крамы з таварамі прадпрыемстваў крымінальна-выканаўчай сістэмы размешчаны ў гарадах, дзе знаходзяцца папраўчыя ўстановы: Гомелі, Оршы, Ваўкавыску, Івацэвічах і інш. Аднак асартымент там абмежаваны толькі той прадукцыяй, якая вырабляецца на мясцовай вытворчасці.

— Кірункі дзейнасці нашых прадпрыемстваў — дрэваапрацоўка, металаапрацоўка, швейная вытворчасць, — расказаў часова выконваючы абавязкі начальніка ўпраўлення арганізацыі вытворчасці працоўнага выкарыстання спецкантынгенту Дэпартамента выканання пакаранняў МУС Даніл Яцкоў. — Мы ж не толькі вырабляем прадукцыю, якая карыстаецца папулярнасцю сярод фізічных асоб. Супрацоўнічаем з буйнымі прадпрыемствамі: МАЗ, БЕЛАЗ, МТЗ. Ствараем швейную прадукцыю для сілавых структур Беларусі: форменнае абмундзіраванне, спецадзенне.

Ва ўмовах пазбаўлення волі людзям важна мець магчымасць працаваць — гэта з'яўляецца найлепшым стымулам на шляху да выпраўлення. Прычым за сваю працу зняволеныя яшчэ і заробак атрымліваюць. А многія — і новую спецыяльнасць, якая нярэдка выручае іх і ў звычайным жыцці.

Па словах Данілы Яцкова, наладжана і паспяхова функцыянуе сістэма навучання асуджаных. «Створаны філіялы прафесійна-тэхнічных вучылішчаў, дзе можна атрымаць запатрабаваныя спецыяльнасці, якія не будуць лішнімі як падчас прыцягнення асуджаных да працы ў працэсе адбывання пакарання, так і па вызваленні такіх грамадзян, — заўважыў ён. — Па нашым меркаванні, праца — адзін з найважнейшых фактараў, які ў далейшым уплывае на сацыялізацыю асуджаных».

Вераніка КАНЮТА

Фота Лізаветы ГОЛАД

Дзяржынскі раён

Выбар рэдакцыі

Грамадства

Што трэба ведаць тым, хто адпачывае каля вадаёмаў

Што трэба ведаць тым, хто адпачывае каля вадаёмаў

Нават пры наяўнасці на пляжы ратавальнай станцыі не варта грэбаваць элементарнымі правіламі бяспекі. 

Экалогія

У Беларусі пабудуюць 30 рэгіянальных смеццеперапрацоўчых заводаў

У Беларусі пабудуюць 30 рэгіянальных смеццеперапрацоўчых заводаў

Агульная плошча звалак у Беларусі займае каля 4 тысяч гектараў.