Наша мінулае неаддзельнае ад нас — менавіта яно робіць нас тымі, кім мы з’яўляемся на дадзены момант. І калі чалавек, з якім вы вырашылі звязаць лёс, перажыў развод і мае дзяцей ад першай жонкі (а тое, што «былых дзяцей не бывае», агульнавядома), — важна разумець, што пасля роспісу ўсё гэта будзе часткай і вашага жыцця. Ці будаваць адносіны з мужчынам, які ўжо знаходзіўся раней у шлюбе? Да чаго трэба быць гатовай? І што дапаможа стварыць гарманічную сям’ю, калі ваш муж — «з мінулым»?
Калі вам ужо «крыху за трыццаць» (а асабліва калі «далёка за трыццаць») і вы сабраліся замуж, то, хутчэй за ўсё, для вас вышэйпералічаныя пытанні — надзённыя і канкрэтныя, а не абстрактныя і адцягнутыя. І пачнём з добрых навін. Псіхолагі (у прыватнасці вядомы і модны Міхаіл Лабкоўскі) сцвярджаюць, што мужчына, які перажыў развод, — больш падыходны варыянт для выбудоўвання сур’ёзных адносін, чым чалавек, які, перасягнуўшы трыццаціпяці-саракагадовую мяжу, яшчэ ні разу не быў «галоўным героем» на шлюбнай цырымоніі. У першым выпадку ў наяўнасці арыентаванасць на сям’ю і на сур’ёзныя адносіны, у другім, як кажуць, узнікаюць пытанні…
Статыстыка, на жаль, сведчыць, што сёння каля паловы шлюбаў распадаецца. Але ваш выбраннік калісьці ўсё ж паступіў як прыстойны чалавек: ажаніўся з каханай жанчынай і ўзяў на сябе адказнасць за агульных дзяцей. І гэта гаворыць на яго карысць. Таму што мужчына «з чыстым пашпартам», цалкам верагодна, такой адказнасці на сябе ні разу не прыняў. То-бок цалкам верагодна, што ён па нейкіх прычынах не здольны на партнёрскія адносіны — а прычын тут можа быць мноства, адна адной «лепш»: ад хранічнай інфантыльнасці да хранічнага эгаізму. Можа быць, вядома, і такое, што сваёй адзінай і непаўторнай за многія гады ён проста не сустрэў, бо ўсё жыццё шукаў менавіта вас. Але, пагадзіцеся, калі вам ужо «трохі за трыццаць» (а тым больш калі «далёка за трыццаць»), наўрад ці вы да гэтага часу не выйшлі з узросту, калі верыш у сюжэты бразільскіх серыялаў. Так што разведзены мужчына — варыянт са «знакам якасці». Іншая справа, што для наладжвання гарманічных адносін з такім мужчынам трэба ўлічыць шэраг важных нюансаў. І пачаць варта са збору інфармацыі.
Першае і галоўнае пытанне, на якое неабходна ведаць адказ, задумваючыся аб шлюбе з разведзеным мужчынам, — у чым прычына папярэдняга разводу вашага выбранніка, гавораць псіхолагі. Калі аб’ектыўная прычына — п’янства-алкагалізм, здрады, канфліктнасць і гэтак далей, лепш адмовіцца ад прывабнай ідэі «са мной усё будзе па-іншаму». Не будзе! Людзі не мяняюцца, «выхаваць» дарослага чалавека нікому не пад сілу. Не трэба быць экстрасэнсам, каб зразумець, што гісторыя яго папярэдняга няўдалага шлюбу — дакладны прагноз і вашага будучага сямейнага жыцця, а таксама важны сігнал: не паўтарай памылак яго «былой», не наступай на «чужыя граблі».
Калі ж аб’ектыўна «вінаватыя абодва» і наогул усё, што адбылося — «справа жыццёвая», важна ўлічыць наступны аспект, а менавіта: што думае і гаворыць аб сваім папярэднім шлюбе сам мужчына. Якія высновы ён вынес з гэтых адносін і з якімі перакананнямі прыйшоў да шлюбу з вамі? Калі мужчына называе вінаватай у скасаванні шлюбу выключна сваю былую жонку, а сам ён «белы і пухнаты» — гэта нагода сур’ёзна задумацца. «Трывожнымі званочкамі» павінны стаць негатыўныя выказванні пра «былую», падрабязныя расповеды пра іх адносіны ў негатыўным ключы, доўгая, нудная і дробязная дзяльба маёмасці. І асабліва кепскі «сімптом» — імкненне ўхіліцца ад аліментаў, схаваць свае прыбыткі ад «былой», каб плаціць менш, нежаданне ўдзельнічаць у выхаванні і прымаць удзел у лёсе сваіх дзяцей ад першага шлюбу.
Калі вы маладая і нявопытная (размова пра шлюб, дзе мужчына значна старэйшы), то, магчыма, вам падасца, што гэты апошні пункт — якраз станоўчы момант, і так вам будзе прасцей і лепш. Аднак падобнае стаўленне мужчына прадэманструе ў будучыні і да вашых агульных дзяцей — ці такога бацьку вы хочаце для іх? Аргумент «са мной усё будзе па-іншаму, бо паміж намі — сапраўднае каханне» пакіньце ўбаку як несур’ёзны. Менавіта так усё і будзе, бо гарачае каханне, якім бы моцным яно ні было, жыве не надта доўга, а потым уступаюць у сілу альбо цеплыня, павага, адказнасць, альбо адхіленасць, халоднасць і эгаізм.
— Калі мужчына вінаваціць у разводзе толькі жанчыну, на жаль, верагодна, ён заўсёды будзе перакладаць адказнасць за любую негатыўную сітуацыю на таго, хто побач — у дадзеным выпадку ўжо на вас, — падкрэслівае сямейны псіхолаг Кацярына Алёхіна. — Нармальная самаацэнка, усвядомленасць, дарослае стаўленне да жыцця — усё гэта ў тым ліку і пра ўменне прызнаваць сваю віну.
— Калі ваш мужчына здолеў захаваць з былой жонкай нармальныя цывілізаваныя адносіны, значыць: а) ён будзе паважаць і вас; б) яго «былая» — жанчына разумная і ва ўсіх адносінах адэкватная. Таму існуе высокая верагоднасць, што неўзабаве яна таксама знойдзе сабе мужчыну, і сітуацыя ўраўнаважыцца, — адзначае псіхолаг.
— Пытанне адносін разведзенага мужчыны да сваіх дзяцей, — мабыць, найважнейшае, калі вы плануеце ў далейшым мець з ім уласных дзяцей, — дадае суразмоўніца. — Калі ён здольны адвярнуцца ад ужо існуючых сына ці дачкі, выкрасліць іх з жыцця, не трэба цешыць сябе ілюзіямі, што ён стане добрым бацькам для вашага агульнага дзіцяці.
Ну, а завяршыўшы збор інфармацыі і яе аналіз, варта спытаць сябе, наколькі камфортна вам мірыцца з тым, што:
Калі ўсё гэта здаецца вам непрымальным, шлюб з разведзеным мужчынам — не ваша гісторыя, не варта ў яе нават увязвацца.
А зараз падрабязней пагаворым пра «былую». Вядомы стэрэатып «яго жонка не сцяна, можна і пасунуць» у дадзеным выпадку не працуе. Гэта жанчына будзе заўсёды прысутнічаць у вашым жыцці, ёй будзе патрабавацца дапамога па доме і гаспадарцы ва ўсіх справах — прынамсі, пакуль у яе жыцці не з’явяцца новыя адносіны. І звяртацца яна будзе да свайго былога мужа — проста таму, што за гады сумеснага жыцця прывыкла па ўсіх гэтых пытаннях да яго звяртацца. Паправіць, закруціць, прывезці... І самае неразумнае з вашага боку — істэрыкі і заявы накшталт «або я, або яна!». Менавіта падобныя выказванні падштурхнуць мужчыну да разважанняў на непатрэбныя тэмы: у прыватнасці, аб тым, што «старое каханне не ржавее».
— Ідэальны варыянт — выбудоўванне роўных прыяцельскіх адносін з яго былой жонкай, — кажа Кацярына. — Гэта прадэманструе мужчыну, што вы — дарослая, мудрая жанчына, і ён гэта, безумоўна, ацэніць.
Дарэчы, адзін з распаўсюджаных жаночых страхаў у адносінах з разведзеным мужчынам — тое, што «ён будзе параўноўваць мяне са сваёй былой». Будзе. І яго сябры, і блізкія сваякі (мама і бацька, браты і сёстры) таксама будуць параўноўваць — гэтага не пазбегнуць. Але ў вашых сілах зрабіць так, каб параўнанне было на вашу карысць.
Акрамя таго, вам давядзецца выбудоўваць адносіны з яго дзецьмі ад першага шлюбу — гэтага таксама не пазбегнуць. Псіхолагі, дарэчы, кажуць, што, калі вам здаюцца ну проста невыноснымі і нават агіднымі дзеці вашага выбранніка, — наўрад ці вы на самай справе яго кахаеце. Хутчэй за ўсё, гэта проста закаханасць, якая хутка пройдзе. Калі гаворка пра каханне, вы не можаце не адчуваць прыхільнасці да «працягу» каханага чалавека.
— Выбудоўванне адносін з дзецьмі ад першага шлюбу вашага мужчыны — вельмі важны складнік сямейнай гармоніі, — падкрэслівае псіхолаг. — Вам не трэба імкнуцца замяніць ім маму, канкурыраваць з ёй, але давядзецца стаць ім старэйшым таварышам, нечужым чалавекам. У гэтым выпадку дзеці не атрымаюць траўмы ад разводу вашага мужчыны з іх мамай, бо клапатлівых, значных дарослых у іх жыцці з вашым з’яўленнем не паменшыцца, а дадасца. І вашы адносіны не дадуць расколіну.
Дык ці магчымы шчаслівы шлюб з разведзеным мужчынам? Калі ўзаемныя пачуцці моцныя і вы абодва — дарослыя, разумныя людзі з усвядомленым падыходам да адносін, тады, вядома, ваш шлюб будзе гарманічным і моцным. Але, вырашыўшыся адказаць згодай на прапанову рукі і сэрца ад разведзенага мужчыны, неабходна ўбачыць «падводныя камяні» і правесці паміж імі вашу «любоўную лодку». Як гэта зрабіць?
— «Першая жонка» можа занадта актыўна прысутнічаць у вашым жыцці, патрабаваць увагі былога мужа. І важна адразу ж, яшчэ ў пачатку вашага сямейнага жыцця, дакладна расставіць межы, пагаварыўшы з мужчынам, — падкрэслівае Кацярына. — Менавіта ён павінен знайсці той баланс, які задаволіць абодва бакі: удзяляць дастаткова часу і вам, і «той сям’і».
ца ўвесь ваш такт, каб давесці, што вы дзіцяці не вораг, а сябар. Добрыя адносіны з яго дзецьмі — абавязковы складнік вашага сямейнага шчасця, так што давядзецца прыкласці да гэтага і мудрасць, і цярпенне.
— Гэта не такая ўжо рэдкая сітуацыя ў практыцы сямейных псіхолагаў, і гэты «падводны камень» — дакладней, яго магчымасць, хоць гэта зусім неабавязкова — таксама важна ўлічваць, уступаючы ў шлюб з разведзеным мужчынам, — адзначае спецыяліст. — Вяртаючыся да пытання аб тым, ці магчымы шчаслівы шлюб з разведзеным мужчынам, адкажу так: вядома, магчымы. Хоць такі шлюб запатрабуе ад вас псіхалагічнай гнуткасці, а часам — нават рашэння нестандартных псіхалагічных «рэбусаў». Але калі вы гатовыя працаваць над адносінамі, валодаеце дастатковым жыццёвым досведам і ўзброіцеся цярпеннем і мудрасцю, узнагародай вам стануць сямейнае шчасце, давер і каханне.
Дзіяна РОНІНА
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.