Натуры і скульптуры Сяргея Бандарэнкі
Уваходзіш у залу, а насустрач — конь, які зараз, здаецца, вырвецца і пабяжыць на вуліцу, на праспект, дзе яму будзе вольна. Проста конь такі вялізны (яўна больш за тры метры даўжынёй і вышынёй), што яшчэ добра трэба падумаць, якое месца падышло б для яго пастаяннай дыслакацыі. Насамрэч гэта скульптура. Вялізны конь, праца беларускага скульптара Сяргея Бандарэнкі. І нездарма менавіта ён сустракае гасцей адразу пры ўваходзе ў залу Музея сучаснага выяўленчага мастацтва: гэта персанальная выстава Сяргея Бандарэнкі, які ў творчасці знайшоў сваю ўлюбёную тэму. Вядома, як скульптар, ён умее ляпіць усё — і гэтаму таксама ёсць рэальныя прадстаўленыя доказы ў выглядзе канкрэтных прац. Але галоўныя тут усё-такі коні — самі па сабе, з вершнікамі, кампазіцыі з коньмі і гэтак далей.
Пра асабістую прыхільнасць скульптара «коннай тэматыцы» мы аднойчы распавядалі чытачам падрабязна ў інтэрв'ю з ім. Але цяпер кожны мае магчымасць удакладніць веды пра Сяргея Бандарэнку яшчэ і асабістым адчуваннем яго творчасці — гэтых коней трэба бачыць. Таму што яны, нават калі выраблены з такога важкага матэрыялу як бронза, здаюцца неверагодна лёгкімі, нібыта ляцяць, лунаюць, імкнуцца наперад, падуладныя ветру і логіцы руху. І тут, на выставе, ёсць усё ж магчымасць азнаёміцца з самымі рознымі скульптурамі аўтара, творы якога, дарэчы, можна бачыць на вуліцах нашых гарадоў (не толькі Мінска). Ці не самая знакамітая скульптура Бандарэнкі — помнік князю Альгерду, які з'явіўся сёлета ў Віцебску. Як жа персанальная выстава без гэтай працы? Так, натуральна, помнік з вуліцы ў залу музея не прыцягнеш, тым больш што важыць ён амаль тры тоны і дасягае чатырох метраў у вышыню. Але ён усё ж прысутнічае — у выглядзе мадэлі і віртуальнай прэзентацыі, якая круціцца пры ўваходзе ў залу, як своеасаблівыя ўводзіны ў тэму і творчасць Сяргея Бандарэнкі. Гэта для тых, каму яны патрэбны. Таму што пасля працы над значнымі для краіны помнікамі імя аўтара шырока вядомае ў Беларусі, а яго персанальную выставу адзначылі сваёй увагай віцэ-прэм'ер беларускага ўрада Анатоль Тозік і міністр культуры Беларусі Барыс Святлоў. Але калі казаць, што гэта скульптар, блізкі да народа, то трэба ўзгадаць скульптуры, якія стаяць каля мінскага цырка.
Зразумела, чаму выставу назвалі «Конь і яго рыцар». Пры тым, што рыцары на конях у скульптурах аўтара таксама ёсць — і ўсе вартыя ўвагі і пашаны. Такія, што вартыя быць помнікамі ў Беларусі. Вось невялікая конная скульптура Міндоўга ў бронзе, вось легендарны Усяслаў Чарадзей (не так яго сабе ўяўляла, а, між іншым, у аўтара ён выглядае вельмі рамантычна — адразу хочацца пачытаць дадаткова што-небудзь пра беларускую гісторыю). І калі зусім рамантыкі хочацца, то калі ласка: «Вершнік у масцы» дасць глебу для фантазій ці амаль казачны «Кароль Артур». Але ёсць і чыстае захапленне коньмі як прыгожымі, вытанчанымі істотамі, натуры якіх лепш за ўсё праяўляюцца ў руху, — глядзіце працы «Вецер у грыве» ці «Скачок».
Трэба разумець, што вялікія скульптуры ў зале музея выставіць складана, таму многія працы мы бачым у паменшаных копіях альбо мадэлях. Але ёсць і анімалістычныя скульптуры — на другім паверсе музея яны ўтвараюць нейкі своеасаблівы сад дзіўных істот, але кожная з іх пададзена ў вобразным аўтарскім уяўленні. «Фаэтон» нагадае пра міф, калі сонечная калясніца адхілілася ад шляху і ледзь не спаліла ўсё жывое на зямлі, але магутны Зеўс уратаваў Гею. Зачароўвае прыроднай прыгажосцю Афрадыта, у якой паядналася зямное і нябеснае. Гэта свет, дзе слімакі — насамрэч жанчыны з ракавінкамі, якія падаюцца ці то эксклюзіўнай вопраткай, ці то адмысловым аксесуарам. Тут зусім нечаканыя жабкі і абсалютна рэальныя скарпіёны. Тут сплятаюцца рэальнасць і фантазія. Але рэальнасць — гэта той грунт, на які абапіраецца Сяргей Бандарэнка. Проста таму, што коні — гэта коні, а людзі — гэта людзі. І яго разумеюць: творы гэтага беларускага скульптара ўдзельнічаюць у многіх міжнародных выставах. Яму давяраюць ляпіць партрэты сваіх любімцаў (коней, вядома), якія станавіліся чэмпіёнамі Еўропы і Алімпійскіх гульняў, ён прадстаўляе свае працы ў рамках конных выстаў. І трэба сказаць, што ў Беларусі яго выставы адбываюцца перыядычна. Былі персанальныя выставы ў Палацы мастацтваў, Нацыянальным мастацкім музеі, у Палацы Рэспублікі. Зала Музея сучаснага выяўленчага мастацтва невялікая, але для такой выставы аказалася ўтульнай.
Пасля агляду вы спыніцеся каля сцяны з вялікім аркушам. На ім можна пакідаць свае пажаданні: які помнік у Беларусі патрэбны, на вашу думку. Прапанова можа быць любая: нейкая праца з тых, што вы толькі што бачылі, ці свая — у нас жа багата асоб, якіх можна ўшанаваць. І ў нас ёсць скульптары, якія гатовы гэта рабіць.
Ларыса ЦІМОШЫК
Летась зафіксавана зніжэнне колькасці выпадкаў гібелі на вытворчасці.
Карэспандэнты «Звязды» пабачылі, як праходзяць рэпетыцыі.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.