Вы тут

Сёння — Міжнародны дзень энергазберажэння


Сёлета ён праходзіць пад дэвізам «Захаваем клімат, зберагаючы энергію і рэсурсы».


Фота: rcmm.ru

Гэта свята было ініцыянавана «Школьным праектам па выкарыстанні рэсурсаў і энергіі» (SPARE) у 2008 годзе. З таго ж часу яго адзначаюць і ў Беларусі. Галоўным партнёрам Дня энергазберажэння ў нашай краіне з’яўляецца Дэпартамент па энергаэфектыўнасці Дзяржаўнага камітэта па стандартызацыі, які ажыццяўляе дзяржаўнае кіраванне ў сферы энергазберажэння.

Паводле інфармацыі Дэпартамента, у нашай краіне на працягу больш чым 25 гадоў паслядоўна праводзіцца дзяржаўная палітыка ў вобласці энергазберажэння. Прынятыя дакументы ўлічваюць сучасныя рэаліі і выклікі, арыентуюць усе сферы эканамічнага і сацыяльнага жыцця на пастаяннае ўкараненне энергаэфектыўных тэхналогій, правядзенне мадэрнізацыі і засваенне інавацый, фарміраванне і выхаванне культуры беражлівых адносін да энергарэсурсаў.

У краіне шмат робіцца для развіцця аднаўляльных крыніц энергіі ў якасці альтэрнатыве нафце і газу, доля якіх у валавым спажыванні паліўна-энергетычных рэсурсаў пастаянна расце і сёння складае 6,2%. На 0,8% да ўзроўня 2010 года павялічылася і доля выкарыстання мясцовых відаў паліва і дасягнула 15,5%. Вытворчасць энергіі на гідраэлектрастанцыях стала большай у 3,2 разы, на ветраўстаноўках — у 75 разоў. У 70 разоў за апошнія чатыры гады вырасла выпрацоўка электраэнергіі сонечнымі ўстаноўкамі.

Калі ў 1990 годзе Беларусь была адна з самых энергаёмістых рэспублік СССР, то, згодна з апошнімі данымі Міжнароднага энергетычнага агенцтва, у 2016-м фактычны паказчык энергаёмістасці валавога ўнутранага прадукта Беларусі знізіўся ў адносінах да 1990 года амаль у 3,5 разы. Наша краіна дасягнула ўзроўня энергаёмістасці такіх развітых краін з падобнымі кліматычнымі ўмовамі, як Канада і Фінляндыя. Усё гэта — дзякуючы своечасова прынятым Урадам краіны мерам і мэтанакіраванай рабоце па энергазберажэнні і забеспячэнні ўстойлівай тэндэнцыі па зніжэнні энергаёмістасці ВУП.

Энергазберажэнне эканамічна выгадна кожнаму грамадзяніну і дзяржаве ў цэлым, упэўнены спецыялісты. Мерапрыемствы па эканоміі энергарэсурсаў у 2,5–3 разы танней, чым вытворчасць і дастаўка такой жа колькасці зноў атрыманай энергіі. Акрамя таго, дзякуючы эканоміі энергіі, зніжаюцца выкіды парніковых газаў, што дапамагае ў барацьбе са зменай клімату.

Самыя простыя спосабы энергазберажэння даступныя любому і могуць прымяняцца ў побыце паўсюдна. З метадычнымі рэкамендацыямі, вучэбнымі дапаможнікамі, а таксама практычнымі спосабамі эфектыўнага выкарыстання энергарэсурсаў у побыце можна азнаёміцца на афіцыйным сайце Дэпартамента па энергаэфектыўнасці.

Правілы, якія дапамагаюць эканоміць энергію:

  • выключайце лішняе святло;
  • у электрычных чайніках і пральных машынах своечасова ўбірайце накіп, а пылазборнік у пыласосе ачышчайце пасля кожнай уборкі;
  • не пакідайце прыборы ў рэжыме чакання, а таксама ўключанымі на ноч зарадныя прылады і абагравальнікі
  • замяніце простыя лямпы на энергазберагальныя святлодыёдныя;
  • працірайце плафоны і лямпы;
  • уцяпліце пакой;
  • выключайце ваду падчас чысткі зубоў;
  • ліквідуйце месцы ўцечак вады і іншае.

У Міжнародны дзень энергазберажэння ва ўсіх краінах, дзе адзначаецца гэта свята, праходзяць мерапрыемствы, галоўная задача якіх — інфармаваць людзей аб важнасці эканоміі энергарэсурсаў, аб спосабах энергазберажэння і існуючых аднаўляльных крыніцах энергіі.

Вераніка КОЛАСАВА

Выбар рэдакцыі

Грамадства

Медыцынскі агляд у віцебскіх газавікоў ажыццяўляе... робат

Медыцынскі агляд у віцебскіх газавікоў ажыццяўляе... робат

А наведвальнiкаў крамы кансультуе выява спецыялiста.

Грамадства

Не трапіць у рабства анлайн. Як у краіне змагаюцца з гандлем людзьмі

Не трапіць у рабства анлайн. Як у краіне змагаюцца з гандлем людзьмі

З 2000 года ў Беларусі выяўлена 4421 злачынства, звязанае з гандлем людзьмі.